Breaking News

KREDO. Dans les pas de Guy Tirolien, pour marquer le centenaire de sa naissance en hommage à la Journée Internationale du créole

14 Oct 2016
854 fois

Mwen osi an ni ti rèl-sigré an mwen séré kon biki an pòch-dèyè

Mé prangad rapòté sa lè van pichòt ka langanné

Ni douvan bannélo moun ka ba lari chenn

Yo ké fè jé èvè tèt a-w ou sav

                      Dapré mwen

Sòlèy sé on bèl zé pèwlouz klérant kon klendendeng

Lannuit ponn

Dapré mwen priyé-dyé-Bondyé ka déviré désann asi latè

Kon fifiné dousin an dé koko-men ki lonji-douvan

Dapré mwen zétwal lanké an syèl sé nanm a nonm trépasé ka boukanné

Dapré mwen latè sé on zoranj  yo mété la èspré si an ka Bondyé swèf

Dapré mwen bèl ti flè ka monté janbé founèt

Pou dousi hokèt an kè a négyon ka pléré gwo-dlo

Dapré mwen on wòch sé on pyébwa kapon ki pa té nòz profité

Dapré mwen ou ka jwenn épi labonté yenki

Lè-w rivé dépozé blès a doulè ki two pézan dèyè do a-w

Dapré mwen  yonn é yonn ka fonn adan onsèl kò

Menm lè fè lanmou  ka pran kadans a konba

Dapré mwen sé lodè a swé touné an san tousèl

Ka fimayé flè pou awtis fè bèlté pròspéré

Dapré mwen sé afòs nou ké enmé nou

Dèmen jou ké fin pa ouvè èspré pou nou…            

 

Max Rippon. Bitasyon Durocher. 2016-10-28

Évaluer cet élément
(0 Votes)
CCN

Webzine cari-guadeloupéen créé en 2008. Notre premier objectif est d'établir par ce biais un véritable lien entre les caribéens, qu'ils soient francophones, créolophones, anglophones, hispanophones. L'information est donc pour CCN une matière première d'importance capitale.

Site internet : www.caraibcreolenews.com
Connectez-vous pour commenter

Toute l'actu de la Guadeloupe et des Caraïbes.

Articles Populaires